Benvid@s ao Blog para a Participación Cidadá do Concello da Coruña

Desde a Concellería de Igualdade e Participación Cidadá (I+PC) do Concello da Coruña queremos darvos a benvida a este Blog "Participación Coruña". Pretendemos, moi humildemente, poñernos ao seu servizo como un posible vehículo transmisor das inquedanzas cidadás así como un termómetro que, sen ánimo de suplantar a representatividade conxunta da cidadanía estea esta organizada ou non, mida o latexo do sentir diario das coruñesas e coruñeses. Tan só se deben cumprir dos requisitos: a liberdade e o respecto.

Neste blog non só poderedes recibir toda a información sobre as actividades desta Concellaría, sinaladamente as relativas á área de Participación, se non que contemplaremos calquera nova de incidencia cidadá que poida vehiculizar, tamén, as opinións, queixas e suxestións xa que todas as persoas que habitamos esta marabillosa pero non perfecta cidade da Coruña temos e presumimos de exercer o dereito tanto a opinar como a ser tid@s en conta independentemente do seu sexo, idade, cultura, ideoloxía, raza, relixión ou procedencia.

Animámosvos, ademais, a participar en todas as enquisas abertas que iremos colgando na barra lateral dereita para coñecermos, de primeira man, o voso sentir a respecto de todas aquelas circustancias que, ben de xeito positivo ou ben de xeito negativo, inciden na percepción e no benestar do conxunto de cidadáns e cidadás que formamos e conformamos a nosa cidade. Agardámosvos neste voso blog. Unha aperta e ata sempre.